សាវតារនៃការបង្កើត

ក្រសួងរៀបចំដែនដី នគរូបនីយកម្ម និងសំណង់

 

ក្រោមការដឹកនាំប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ក្រសួងរៀបចំដែនដី​ នគរូបនីយកម្ម និងសំណង់ ត្រូវបានបង្កើតឡើងនៅចុងឆ្នាំ១៩៩៨ តាមព្រះរាជក្រឹត្យលេខ នស/១១៩៨/៧២ ចុះថ្ងៃទី៣០ ខែវិច្ឆិកា ឆ្នាំ១៩៩៨។ នៅក្នុងនីតិកាលទី២នៃរដ្ឋសភា ច្បាប់ស្ដីពីការបង្កើតក្រសួងរៀបចំដែនដី នគរូបនីយកម្ម និងសំណង់ ត្រូវបានចូលជាធរមានតាមព្រះរាជក្រមលេខ នស/រកម/០៦៩៩/០៩ ចុះថ្ងៃទី២៣ ខែមិថុនា
ឆ្នាំ១៩៩៩។ ក្រសួងមានបេសកកម្មដឹកនាំនិងគ្រប់គ្រងលើការងាររៀបចំដែនដី នគរូបនីយកម្ម សំណង់ សុរិយោដី និងភូមិសាស្ដ្រនៃព្រះរាជាណាចក្រកម្ពុជា។ ក្នុងសម័យមុនៗ ​វិស័យទាំងអស់នេះស្ថិតនៅក្រោមចំណុះស្ថាប័នដោយឡែកពីគ្នា។

សម័យសង្គមរាស្ដ្រនិយមរហូតមកដល់មុនឆ្នាំ១៩៧៥ វិស័យរៀបចំដែនដី នគរូបនីយកម្ម និងសំណង់ ត្រូវបានគ្រប់គ្រងដោយនាយកដ្ឋាននគរូបនីយកម្ម និងលំនៅឋាននៃក្រសួងសាធារណការ ហើយនៅតាមខេត្ត-ក្រុង កិច្ចការនេះ ត្រូវបានគ្រប់គ្រងដោយមន្ទីរសាធារណការខេត្ត-ក្រុង។ ក្រោយថ្ងៃរំដោះ ៧ មករា ១៩៧៩ មន្ទីររៀបចំក្រុង ត្រូវបានបង្កើតនៅក្រុងភ្នំពេញ ហើយការិយាល័យសំណង់ ត្រូវបានបង្កើតនៅក្រុងភ្នំពេញនិងនៅតាមបណ្ដាខេត្ត ដោយនៅខេត្តខ្លះត្រូវដាក់ឱ្យស្ថិតនៅក្រោមមន្ទីរផែនការ និងនៅខេត្តខ្លះទៀត ការិយាល័យនេះស្ថិតនៅក្រោមមន្ទីរឧស្សាហកម្ម។ ទន្ទឹមនឹងនេះ
សហគ្រាសសំណង់មួយក៏ត្រូវបានបង្កើតឡើងស្ថិតនៅក្រោមក្រសួងឧស្សាហកម្ម ដើម្បីសាងសង់សំណង់របស់រដ្ឋនៅទូទាំងប្រទេស លើកលែងសំណង់របស់ក្រសួងពាណិជ្ជកម្ម មានក្រុមហ៊ុនស្ថាបនាមួយដោយឡែក។ ឆ្នាំ១៩៨៦ ដោយវិស័យសំណង់មានការរីកចម្រើន អគ្គនាយកដ្ឋាន​សំណង់ ត្រូវបានបង្កើតឡើងស្ថិតនៅចំណុះក្រុមប្រឹក្សារដ្ឋមន្ដ្រី ដើម្បីគ្រប់គ្រងវិស័យ រៀបចំដែនដី នគរូបនីយកម្ម និងសំណង់។ ឆ្នាំ១៩៩៣ សម្រាប់រាជរដ្ឋាភិបាលនីតិកាលទី១នៃរដ្ឋសភា អគ្គនាយកដ្ឋាននេះស្ថិតនៅក្រោមក្រសួងសាធារណការ និងដឹកជញ្ជូន ដឹកនាំដោយឯកឧត្តមរដ្ឋមន្រ្តី អ៊ឹង គៀត ហើយឆ្នាំ ១៩៩៤ បន្ទាប់ពី​មានច្បាប់ស្ដីពីការរៀបចំទឹកដី នគរូបនីយកម្ម និងសំណង់ ត្រូវបានដឹកនាំនិងគ្រប់គ្រងដោយគណៈកម្មា​ធិការជាតិរៀបចំទឹកដី នគរូបនីយកម្ម និងសំណង់ ក្រោមឱវាទទីស្ដីការ    គណៈរដ្ឋមន្ដ្រី ដឹកនាំដោយសហរដ្ឋមន្រ្តី ឯកឧត្តម វ៉េង សិរីវុឌ្ឍ និងសម្តេចវិបុលបញ្ញា សុខ អាន។

ក្នុងវិស័យសុរិយោដី នៅឆ្នាំ១៩០៨ ក្រុមសុរិយោដី និងឋានលេខា ត្រូវបានបង្កើតស្ថិតនៅក្រោមទីស្ដីការគណៈរដ្ឋមន្ដ្រី។ នៅឆ្នាំ១៩២៥ នាយកដ្ឋានអភិរក្សភូមិបាល ត្រូវបានបង្កើតស្ថិតនៅក្រោមក្រសួងហិរញ្ញវត្ថុ។ ឆ្នាំ១៩៤៨-១៩៧៥ ក្រុមសុរិយោដី និងការិយាល័យភូមិបាល ត្រូវបានបង្កើតឡើងស្ថិតនៅក្រោមក្រសួងកសិកម្ម។ ឆ្នាំ១៩៨៩-១៩៩៤ ​វិស័យនេះ ត្រូវបានបង្កើតជា នាយកដ្ឋានសុរិយោដីស្ថិតនៅក្រោមក្រសួងកសិកម្ម រុក្ខាប្រមាញ់ និងនេសាទ ដឹកនាំដោយ សម្តេចវិបុលសេនាភក្តី សាយ ឈុំ (ឆ្នាំ ១៩៨៦-១៩៩០), ឯកឧត្តមកិត្តិនីតិកោសលបណ្ឌិត ងួន ញ៉ិល (ឆ្នាំ ១៩៩០-១៩៩៣) និងសម្តេច   ចៅហ្វាវាំង គង់ សំអុល (ឆ្នាំ ១៩៩៣-១៩៩៤) ហើយចាប់ពីឆ្នាំ១៩៩៤ ដល់ដើមឆ្នាំ១៩៩៩ នាយកដ្ឋានសុរិយោដី ត្រូវប្តូរទៅចំណុះទីស្ដីការគណៈរដ្ឋមន្ដ្រី ដឹកនាំដោយ សម្តេចវិបុលបញ្ញា សុខ អាន។

ចំណែកវិស័យភូមិសាស្ដ្រវិញ ពីឆ្នាំ១៩៩៥ ស្ថិតនៅចំណុះក្រសួងការពារជាតិ មានឈ្មោះថា​
ក្រុមភូមិសាស្ដ្រកម្ពុជា បន្ទាប់មកក្នុងរបប លន់ នល់ ប្តូរឈ្មោះជា ក្រុមភូមិសាស្ដ្រខ្មែរ ពីឆ្នាំ១៩៨៥-១៩៩១ ជាការិយាល័យព្រំដែន ចំណុះក្រុមប្រឹក្សារដ្ឋមន្ដ្រី និងពីឆ្នាំ១៩៩១ ដល់ចុងឆ្នាំ១៩៩៨ ជានាយកដ្ឋានភូមិសាស្ដ្រ ចំណុះទីស្ដីការគណៈរដ្ឋមន្ដ្រី។

ដោយពិនិត្យឃើញសារៈសំខាន់និងចំណងទាក់ទងនៃវិស័យការងារខាងលើ ដែលចល័តនៅក្រោមចំណុះស្ថាប័ន​ច្រើនដោយឡែកៗពីគ្នា ទើបរាជ​រដ្ឋាភិបាលកម្ពុជាសម្រេចបង្កើតក្រសួងរៀបចំដែនដី
នគរូបនីយកម្ម និងសំណង់ ដឹកនាំដោយ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ដើម្បីប្រមូលផ្ដុំការងារទាំងអស់​ខាងលើឱ្យមានស្ថិរភាព និងស្ថិតនៅក្រោមស្ថាប័នតែមួយ។ នៅពេលចាប់ផ្ដើមដំណើរការក្រសួង​ដំបូង ទីស្ដីការក្រសួងមានអគារធ្វើការ​នៅលើទីតាំងដី ៣កន្លែងដាច់ពីគ្នា រួមមាន៖ ទីតាំងទី១ ដីឡូតិ៍លេខ៧៧១-​៧៧៣ មហាវិថីព្រះមុនីវង្ស សង្កាត់ បឹងត្របែក ខណ្ឌចំការមន មានសំណង់អគារលំនៅឋាន ៣អគារ និងសាលប្រជុំតូចមួយសម្រាប់ការងាររៀបចំដែនដី នគរូបនីយកម្ម និងសំណង់,
ទីតាំងទី២ នៅផ្ទះលេខ ៥៩-៦៣ ផ្លូវលេខ ១៦៣ សង្កាត់ទួលស្វាយព្រៃ ខណ្ឌចំការមន មានអគារលំនៅឋាន​២ អគារ សម្រាប់ការងារសុរិយោដី និងទីតាំងទី៣នៅផ្ទះលេខ ៤ ផ្លូវកោះត្រល់ ខណ្ឌ       ដូនពេញ មានសំណង់អគារលំនៅឋាន ១ អគារ សម្រាប់ការងារភូមិសាស្ដ្រ។ នៅចុងឆ្នាំ១៩៩៩ រាជរដ្ឋា-   ភិបាលបានអនុញ្ញាតឱ្យសាងសង់អគារថ្មីមួយខ្នងនៅលើទីតាំងទី១ ដើម្បីប្រមូលផ្តុំមកធ្វើការរួមគ្នាតែមួយកន្លែង។

ចាប់ពីថ្ងៃទី ៦ ខែមេសា ឆ្នាំ ២០១៦ ក្រសួងរៀបចំដែនដី នគរូបនីយកម្ម និងសំណង់ ដឹកនាំដោយឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។

នៅឆ្នាំ២០១៩ រាជរដ្ឋាភិបាលសម្រេចឱ្យសាងសង់អគារទីស្តីការថ្មីរបស់ក្រសួងរៀបចំដែនដី
នគរូបនីយកម្ម និងសំណង់ ស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ តាមលិខិតលេខ ១៦០៦ សជណ.ដប ចុះថ្ងៃទី ៣០ ខែតុលា ឆ្នាំ២០១៩ របស់ទីស្តីការគណៈរដ្ឋមន្រ្តី ដើម្បីឆ្លើយតបទៅនឹងតម្រូវការនៃការប្រើប្រាស់។ អគារថ្មីសាងសង់នៅលើផ្ទៃដីទំហំ ៤,៥ ហិកតា តួអគារមានបណ្តោយប្រវែង ១៣២,៧០ ​ម៉ែត្រ ទទឹងប្រវែង ៩៤,៧០ ម៉ែត្រ កម្ពស់ដល់ចុងកំពូលបុស្បុក ៨៩ ម៉ែត្រ ស្មើ ៨ ជាន់ ក្នុងនោះបុស្បុកមានកម្ពស់ ៣៣,២៨ ម៉ែត្រ ក្រឡាផ្ទៃបាតអគារ ១១ ១២៨ ម៉ែត្រក្រឡា ក្រឡាផ្ទៃសំណង់សរុប ៦៣ ១៣៥ ម៉ែត្រក្រឡា ក្រឡាផ្ទៃសំណង់ប្រើប្រាស់ ៣១ ៤០៨ ម៉ែត្រក្រឡា  និងមានចំណតរថយន្តប្រមាណ ៤៥០ គ្រឿង។ នៅខែកក្កដា ឆ្នាំ២០២១ អគារមន្ទីរពិសោធន៍ជាតិសំណង់ ក៏ត្រូវបានសាងសង់ក្នុងបរិវេណទីតាំងដីរបស់ទីស្តីការក្រសួង។

បច្ចុប្បន្ន ក្រសួងរៀបចំដែនដី នគរូបនីយកម្ម និងសំណង់ មានបេសកកម្ម​ចំបងចំនួន ៦ រួមមាន (១).ការងារសុរិយោដី ភូមិសាស្រ្ត និងដោះស្រាយវិវាទដីធ្លី (២).ការងាររៀបចំដែនដី នគរូបនីយកម្ម និងការងារគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា (៣).ការងារសំណង់ និងមន្ទីរពិសោធន៍ជាតិសំណង់ (៤).ការងារលំនៅឋាន និងសម្បទានដីសង្គមកិច្ច (៥).ការងាររៀបចំច្បាប់ គោលនយោបាយ និងលិខិតបទដ្ឋានគតិយុត្ត និង (៦).ការងារផ្តល់សេវាសាធារណៈលើវិស័យដីធ្លី និងសំណង់។

រចនាសម្ព័ន្ធរបស់ក្រសួងចែកចេញជាពីរថ្នាក់ គឺថ្នាក់ជាតិ និងថ្នាក់មូលដ្ឋាន ៖

       1.           រចនាសម្ព័ន្ធនៅថ្នាក់ជាតិ៖ ខុទ្ទកាល័យរដ្ឋមន្រ្តី មជ្ឈ​មណ្ឌល​បណ្តុះបណ្តាលវិជ្ជាជីវៈ នាយកដ្ឋានសវនកម្មផ្ទៃក្នុង និងអគ្គាធិការដ្ឋាន មន្ទីរពិសោធន៍ជាតិសំណង់ និងអគ្គនាយកដ្ឋានជំនាញចំនួន៥ ដែលមាននាយកដ្ឋាននិងអង្គភាពប្រហាក់ប្រហែលចំណុះចំនួន ២៨ នាយកដ្ឋាន។

     2.        រចនាសម្ព័ន្ធមូលដ្ឋាន៖ មន្ទីររៀបចំដែនដី នគរូបនីយកម្ម សំណង់ និងសុរិយោដី​ នៅថ្នាក់រាជធានីខេត្តចំនួន ២៥ និងការិយាល័យ​រៀបចំដែនដី នគរូបនីយកម្ម សំណង់ និងភូមិបាល នៅថ្នាក់ក្រុង ស្រុក ខណ្ឌ ចំនួន ២០៦ ។ បច្ចុប្បន្ន ការិយាល័យ​រៀបចំដែនដី នគរូបនីយកម្ម សំណង់ និងភូមិបាល នៅថ្នាក់ក្រុង ស្រុក ខណ្ឌ ត្រូវបានផ្ទេរទៅនៅក្រោមការគ្រប់គ្រងរបស់រដ្ឋបាលថ្នាក់ក្រោមជាតិ ស្របតាមយន្តការកំណែទម្រង់។

 

ក្រៅពីរចនាសម្ព័ន្ធអចិន្រ្តៃយ៍ខាងលើ ក្រសួងទទួលដឹកនាំអាជ្ញាធរជាតិដោះស្រាយទំនាស់ដីធ្លីគណៈកម្មការសុរិយោដី, គណៈកម្មាធិការ​សម្ប​ទាន​ដី​​សង្គម​កិច្ច, គណៈ​កម្មាធិការ​រៀបចំដែនដី និង
នគរូបនីយកម្ម,គណៈកម្មា​ធិការ​គ្រប់​គ្រង​និងអភិវឌ្ឍ​តំបន់ឆ្នេរសមុទ្រកម្ពុជា, គណៈស្ថាបត្យករកម្ពុជា និងក្រុមប្រឹក្សាជាតិបទប្បញ្ញតិ្តបច្ចេកទេសសំណង់។